A MÚSICA NON AMANSA ÁS BESTAS

A música non amansa ás bestas é unha contradición da famosa frase da lenda de Orfeo, poeta e músico, na que se dicía que a súa gran interpretación coa lira era tan grande que podía amansar a feras, pero todos sabemos que a música non está feita para domar, nin amansar se non para comunicar e reflexionar.

“A música non pode parar unha bala, pero si deter a man de quen preme o gatillo”

Sinopse

A música non amansa ás bestas é a historia dun compositor obsesionado coa música. Tal é a súa obsesión que quere facer unha obra musical “perfecta”, como a música do personaxe mitolóxico Orfeo, a cal se dicía que era tan perfecta que podía amansar ás bestas. Para compoñer esta peza ten como axudante á inspiración, ou como se fai chamar: “a musa”, a que lle fará ver outra perspectiva da música, quitándolle esa obsesión de perfección da cabeza.

O compositor vai probando co espectador a súa obra a través dos estilos, da harmonía e da melodía. Pouco a pouco vai descubrindo a importancia, que teñen na sociedade, elementos como o silencio, a paixón, a sensibilidade, a creatividade e a música, trocando esa idea inicial de amansar pola de facer unha obra para reflexionar.

A música non amansa ás bestas é un espectáculo no que, a través do teatro, a música e a comedia, o espectador reflexiona sobre a sociedade pasada, presente e futura. Nesta peza preséntanse cuestións ao público, que só el poderá responder: que é xusto? Vivimos nunha sociedade tribal, individual ou colectiva? Por que coñecemos mais homes no mundo das artes, e en xeral, que mulleres? Queremos mudar isto? De ser así, que podemos facer para cambialo?

A música é o fío que une todo, a música está e estará presente sempre nas nosas vidas; con ela choramos, rimos… pero tamén bailamos, a música úsase para facer “o ben” pero tamén “o mal”… ou non. Diso xa nos encargamos os seres humanos. A música é, esencialmente, unha ferramenta de comunicación, o “idioma universal” que todos entendemos pero ninguén interpreta da mesma forma. Unha sociedade sen música non pode existir, o silencio tamén é música, e ás veces, a mellor das melodías ou das palabras. A música existe por que a escoitamos, unha sociedade educada en escoitar música é unha sociedade educada para escoitar aos demais.